Lundi er nokkurs konar þjóðarréttur í Vestmannaeyjum og hægt er að fá hann bæði nýjan og reyktan. Reyktur lundi er yfirleitt einungis soðinn en einnig er hann borinn fram ósoðinn sem forréttur. Nýjan lunda er hægt að matreiða á mismunandi vegu og eru margar uppskriftir til. En það er um að gera að gefa hugmyndafluginu lausan tauminn þegar lundi er matreiddur því að lundi er villibráð sem kitlar bragðlaukana.

Lundaveiðimenn í Vestmannaeyjum eru óhræddir við að prófa eitthvað nýtt þegar kemur að matreiðslu á lunda og eru flestar matreiðsluuppskriftir frá þeim komnar.

Eftirtaldar uppskriftir eru frá lundaveiðimönnum komnar. Munið bara að hreinsa vel alla fitu af kjötinu og sinar ef þið flakið lundabringuna.

Það verða þó ekki eingöngu birtar uppskriftir af Lunda á síðunni heldur verða einnig uppskriftir af öðrum sjófuglum sem veiðast við Eyjar.